معايا مبلغ حوالي 3 مليون جنية، عندي 24 سنة شغال في ال software industry، مش ناوي أتجوز قريب، مش معايا عربية أو شقة ومفيش ديون، وشغال ريموت حاليا.لو حضرتك مكاني ممكن تستخدمهم فإيه كاستثمار أو حتي ك lifestyle.انا مش عارف لسه انا حابب ايه عشان أعمله بصراحة، ولا عارف هل هبقا عاوز أكمل في مصر ولا لا بس انا interested أخوض تجربة السفر. لو فيه أي insights هكون في غاية الإمتنان.

هو موضوع الاستثمار ده موضوع محتاج معرفة بالسوق, و أنا معرفتي بالسوق المصري محدودة, فمش حقدر أنصح بحاجات بعينها, لكن ممكن أقولك بشكل عام استراتيجية لتنظيم أولوياتك المالية و انت ممكن تشوف ايه الاختيارات المتاحة قدامك اللي تحقق أهدافك.

• عموماً قبل ما تقدم على خطوة الاستثمار, محتاج تعرف ان الاستثمار بيبقى على مدى طويل, يعني لو انت محتاج الفلوس دي بعد سنة و الا حاجة ده مش كفاية, و احتمال تخسر, و ساعتها الخيارات اللي قدامك حتبقى لازم تكون حاجات مضمونة زي الودائع أو أذون الخزانة مثلاً.
• انت بتقول مفيش عليك ديون, و ده ممتاز, لأن عادة الديون بتبقى أولى بالسداد قبل ما نفكر في الاستثمار
• محتاج تحسب مصاريفك الشهرية عادة بتبقى كام, و تحط جزء يغطي مثلاً من ٣ الى ٦ شهور برة حسبة الاستثمار كمبلغ طوارئ Emergency Fund علشان لو لا قدر الله حصل أي حاجة و دخلك اتأثر ما تلاقيش نفسك مضطر تلجأ لتسييل استثماراتك في وقت ممكن ما يكونش أفضل حاجة, المبلغ ده مش لازم يبقى كاش, بس لازم يبقى في صورة سهلة و قريبة من الكاش, زي مثلاً ذهب أو ودائع قصيرة الأجل, انت مش هدفك تكسب فيهم, هدفك تحافظ على قيمتهم علشان دول زي بوليصة تأمين لاستثماراتك.
• لو عاوز تستثمر في البورصة, أنا برجح انك ما تستثمرش في شركات بعينها و انت لسة خبرتك قليلة, علشان المخاطرة حتبقى عالية و تقلبات السوق ممكن تحطك في مواقف بايخة و انت لسة مش عارف استعدادك للمخاطرة ايه Risk Appetite, فأنا بفضل صناديق الاستثمار المرتبطة بالمؤشرات Index Funds لأن دي عادة بتجاري حركة السوق, فلو السوق علي حتعلى, و لو نزل حتنزل, و لأنها مكونة من عشرات و أحياناً في بعض الأسواق مئات أو آلاف الشركات, فمش بتتأثر قوي بان شركة يحصلها مشكلة مفاجئة.
• لو قدرت توصل للسوق الأمريكي أو العالمي, فمؤشرات زي S&P 500 تعتبر المعيار الأفضل, و ممكن تبص على ال ETF’s اللي بتتبعه من شركات زي Vanguard و بتبقى مصاريف ال Fund زهيدة قوي.