السلام عليكم يا بشمهندس، أنا طالب من الصومال وبدرس علوم حاسوب في الجامعة الوطنية الصومالية، وبحب البرمجة جدًا.
حابب أعرف رأيك في كام حاجة:هل الـTutorials والـCourses لسه مهمة، ولا الأفضل أركز على بناء الـProjects والتطبيق؟
وهل البرمجة لسه تستاهل في عصر الـAI؟ وهل تنصحني أكمل فيها لو هدفي يومًا ما أشتغل في شركات كبيرة زي الـFAANG؟
وأخيرًا، ليه الشركات بتعمل Layoffs للمبرمجين؟ هل ده بسبب ضعف مستواهم، ولو كده ليه تم توظيفهم من الأساس؟
تسلم يا بشمهندس، يا باب المجال ❤️
Anonymous ·
Mohamed Elsherifهو مش بالضرورة ان الكورسات و ال Tutorials بقت مش مهمة بعد انتشار الذكاء الصناعي, بس انت بقى عندك وسيلة إضافية تساعدك في التعليم, ممكن تستخدمها مع المصادر التانية أو لأ, كل واحد حيلاقي الأسلوب اللي بيمشي معاه أكثر, المهم يتعلم مش بالضرورة استخدم ايه. طبعاً التطبيق مهم جداً بس لازم يبقى فيه أساس معرفي أتبنى علشان تعرف تطبق.
البرمجة نفسها كعملية كتابة كود بتتغير, لكن السوفتوير كصناعة موجودة و بتتوسع و بتدخل في مجالات جديدة كل يوم, فما تحبطش نفسك و ان شاء الله التوفيق من عند الله.
ال Layoffs مالهاش علاقة بمستوى الناس, الشركات بتقلل نفقاتها في الأوقات اللي الأسواق فيها مش مستقرة, و في الشركات تقليل النفقات بيبقى عن طريق إلغاء مشاريع توسعية, أو توجيه استثماراتهم من أجزاء مخاطرها عالية لحاجات تانية مضمونة أكثر, و ده بيترجم ان فيه وظايف ما بتبقاش موجودة خلاص بعد ما بتقفل المشاريع أو الأقسام دي, زي أي بيت لما يبقى فيه قلق في البلد بيلم مصاريفه, بس طبعاً احنا بنتكلم على شركات بتحاول ترضي مستثمرين Wall Street ففي الواقع بيبقى الهدف هو إعطاء انطباع ان الشركة بتقلل المصاريف بشكل جاد و كبير علشان المستثمرين يرضوا عليهم و سعر السهم يستقر أو يعلى, رأسمالية بقى.