هل الطبيعي في الشركات اللي شغلها مشاريع حكوميه ان يكون رتم التاسكات ماشي بطيئ خالص ؟ اوقات كتير بخلص تاسكاتي وبقعد فاضي مش لاقي حاجه اعملها أسمع ان دا شبيه باللي بيحصل في vois مثلا

المشاريع الحكومية عادة مش أي شركة معدية بتقدر تاخدها, فيه Procurement Process طويلة و شروط لازم الشركة تعدي بيها علشان أصلاً تقدر تقدم على مناقصات الحكومة, زائد طبعاً العلاقات و الحاجات اللي احنا عارفينها, فطريق الوصول للمشاريع طويل و أغلبه بيحتاج مميزات غير تقينة, فمش سهل بعد ما تاخذ مشاريع بالفعل تتاخذ منك علشان مثلاً شركة تانية قالتلهم أنا عندي تقنية أفضل أو حسلم أسرع, كل ده مش مهم قوي في البيئات دي, و بالتالي المنافسة بتبقى قليلة بمجرد ان المشروع بقى مع الشركة خلاص سواء علشان كسبوا مناقصة المشروع أو تم تكليفهم بالأمر المباشر.

هو دي كلها أرزاق يعني, بس عادة الشركات اللي شغالة بشكل أساسي في مشاريع الحكومة بتبقى مستقرة أكثر عن الشركات اللي بتشتغل في السوق المفتوح

كله حييجي وقته

دي على وضعها كده من أيام ما كنت طالب من أكثر من ٢٠ سنة

هو مش لازم برضه تعامل مديرك على انه مصدر الشغل الوحيد، لان ده فعلا ممكن يسبب مشكلة لو هو ما عندوش حاجة مناسبة فحيحس انه مقصر او انك عمالة زايدة، الأفضل بما انك عارف شغلك و عارف فين المشاكل، انك تاخد مبادرة و تشوف اجزاء انت شايف أنها ممكن تتحسن او تتطور، و تناقشها معاه و تشوف رأيه ايه، مش من باب انك بتشغل وقتك، بس من باب انك شايف فيه مجال للتطور، و ساعتها لو قدرت تقنعه، حتبقى بتشتغل على حاجة انت اللي اخترتها.