عايز اسأل حضرتك..يعني انا بشوف شركات كتير طالبة SWE بعيدا بقا عن التيك ستاك والكلام دا .. دلوقتي انا لو عايز اكون بجد SWE المفروض اكون متخرج من الكلية بعرف اعمل ايه؟ بحيث اوصل للشركات "المحترمة" اللي بتعين مهندسين برمجيات مش بناء علي التيك ستاك .. يارب تكون فاهم سؤالي عشان حاسس ملغبط شوية.

مش معنى ان الشركات مش فارق معاها تفاصيل ال Tech Stack ان المتقدمين ما عندهمش تفضيلات أو خبرات في Tech Stack معينة, هي الفكرة اللي الشركات عادة بتدور عليها ان يكون المهندس عنده أساس قوي يخلي ال Tech Stack شئ ثانوي, لأن الدنيا بتتغير و الشركات الكبيرة برضه عادة عندهم جوة تنوع في التقنيات المستخدمة, فمن مصلحتهم ان الناس تبقى ما عندهاش مشكلة تشتغل بأي حاجة.
ده بيستدعي ان المهندسين يكونوا متأسسين كويس في مبادئ علوم الحاسب نفسها, زي مفاهيم الخوارزميات و هياكل البيانات و التصميم و قواعد البيانات و أساليب التطوير المختلفة زي ال Concurrent/Async/Parallel Programming أو , بحيث ان ال Tech Stacks نفسها تبقى مجرد تطبيق عملي للمفاهيم دي, فالنهاردة شغالين Java تمام, بكرة شغالين Python ما يضرش, بعده حننقل Swift كله زي بعضه.
طبعاً الدنيا مش بالسلاسة دي لأن فيه فروق نوعية أحياناً بتستدعي شوية وقت علشان الناس ايدها تمشي في التقنية, و تغيير التقنية مش هدف في حد ذاته, لكن ما يبقاش فيه رهبة من التغيير أو استخدام الاداة المناسبة حتى لو الاداة دي مش متعود عليها لسة.