هل عامل السن مهم للانضمام للشركات الكبري مثل جوجل . واذا نعم هم يفضلوا اي الاعمار عموماً

موضوع السن ده موضوع مركب، هو السن نفسه مش مشكلة، الفكرة دايماً في التوقعات اللي الانسان حاططها عن كل سن بغض النظر عن قدراته.
بمعنى، ممكن مهندس يكون عنده 20 سنة لسه متخرج و شاطر و بيستخدم حاجات جديدة تكون انتاجيته تعادل واحد بقاله 5 سنين بيشتغل بس مش بيطور نفسه و بيشتغل كأنه لسه متخرج امبارح، الشركة مش حتفاضل الأصغر، بس ممكن ما ترقيش الأكبر لأنه فعلاً مش مميز لدرجة انه يترقى، و الموضوع ده بنشوفه في الشركات الكبيرة كتير، ممكن تلاقي مهندس وقف عند نقطة معينة في السلم الوظيفي و بقاله مثلاً 10 سنين فيها، لا بيطلع و لا بينزل، الشركة مبسوطة بيه كده و هو مبسوط كده، ممكن تلاقي مديره و مدير مديره أصغر منه. و ما حدش متضايق، أو على الأقل مش عاملة مشكلة.

بالنسبة للانضمام للشركات، السن ممكن يكون مشكلة في حالة ان المتقدم عاوز مرتب يتناسب مع احتياجاته كانسان في سنه، مثلاً متزوج و عنده أولاد و التزامات مادية، لكن للأسف قدراته لا تتناسب مع المرتب اللي هو متوقعه، و ممكن شاب تاني يقبل الوظيفة بمرتب أقل و يقدر يعملها على أحسن وجه برضه، علشان كده السن نفسه مش مشكلة، قد ما هي القدرات و تناسبها مع السن.