يعني ايه APIs في الويب ؟

ال API's نفس المعنى في أي حتة، الفكرة كلها ان أي نظام لما بيسمح لأطراف تانية غير المطورين الأساسيين للنظام انهم يبنوا فوق النظام ده لازم يقدم خدمات ليهم علشان يقدروا يبنوا فوقه، الخدمات و العمليات دي بيبقى اسمها API's فمثلاً لما بتعمل برنامج بيشتغل على ال Windows فانت بتستخدم ال Windows API's علشان تقدر تعمل عمليات نظام التشغيل بيقدمهالك زي ال File Management مثلاً و نفس الوضع في الويب، لو بتعمل Website مثلاً بيستخدم Facebook في انه يعمل Authentication أو بيستخدم ال Social Graph بتاع Facebook علشان توصل لأصدقاء المستخدم و هكذا، فانت بتستخدم Facebook API's علشان تتواصل مع Facebook بالنيابة عن المستخدم.
و مش لازم تكون ال API's مقدمة من نظام كبير أو حاجة، انت ممكن تكون مقسم النظام بتاعك لطبقات و كل طبقة بتقدم API's للطبقات اللي فوقها علشان تستخدمها، ده عموماً بيسهل عملية التصميم و بيخلي فيه حرية للمصممين انهم يقدروا يغيروا في تفاصيل الطبقات زي ما يحبوا طول ما ال API's ما اتغيرتش.
يعني بشكل عام، لو تخيلت الفيشة بتاعة الكهربا اللي في بيتكم فدي مبدئياً عبارة عن API بتقدمها شركة الكهربا علشان تشتغل عليها أي جهاز كهربي، و ليها معايير زي مستوى الفولت و التيار و شكلها اللي بيتبع معايير عالمية بحيث أي جهاز غير متطابق مع المواصفات دي ما يقدرش يستخدم الفيشة دي من غير ما تستخدم Adapter. هي نفس المبادئ بالضبط لأي API في الدنيا.