ازاي حد يبني كارير كـ software architect من وجهه نظرك يا بشمهندس؟
خبرتي حاليا ٥ سنين تقريبا بين backend and fullstack
في مصادر كتير لكني مهتم تحديدا بمنهجيه حضرتك في رسم خطه لده من واقع تجربتك .. وشكرا

هو عموماً مؤهلات ال Software Architect فيها جزء دراسة, و ده حتلاقيه في الكتب المختلفة و فيه كتب كثير ممتازة بالاضافة لخبرات حقيقية في تطبيقات الافكار النظرية دي, و فيه جزء برضه ليه علاقة بال domain اللي انت بتتخصص فيه سواء business domain مثلاً finance, healthcare, education, information security, ... etc أو technology domain مثلاً Infrastructure, Mobile, Distributed Systems, Web, ... etc مع قدرات شخصية في التعامل مع الناس و القيادة و التفاوض و بناء العلاقات و التأثير و ال Presentation Skills و خلافه, و كل شخص بيبقى خليط من حاجات كثير من دي من خبرات متراكمة.

الجزء التقني من ال Software Architecture ده أي مهندس عنده خبرة كافية و seniority معقولة يقدر يقوم بيه في اطار فريقه أو شركته, و مش بالضرورة يكون المسمى بتاعه Architect لكن بيلعب الدور بكفاءة بالاضافة للأدوار التانية اللي بيلعبها سواء Team Lead أو Software Engineer, و مش كل الأماكن أصلاً بيبقى عندها وظيفة أو مسمى مستقل لل Architects.
فعموماً مش لازم تبني خطة انك بالضرورة تاخذ مسمى معين, لكن اتعلم ال Architecture نفسه و ارسم لنفسك خطة مناسبة لمهاراتك و نقط قوتك, لو بتحب تغوص في التفاصيل اختار مجالات بعينها و اعرفها كويس و ابني خبرات عميقة, لو بتحب تهتم أكثر بالصورة العامة, يبقى محتاج تستثمر في قدراتك على التعامل مع اجزاء و فرق عمل مختلفة طول الوقت و ازاي تسأل و تربط المعلومات دي ببعض, و مهم طبعاً انك تكون فاهم ال Business Domain بتاع المكان اللي انت شغال فيه, يعني الشركة أو المؤسسة دي بتعمل فلوسها ازاي؟ ايه اولوياتها, مين منافسنها, ايه الحاجات اللي ممكن تقف في طريق توسعها و ازاي نواجهها بدري, ايه الحاجات اللي فيها inefficiencies و ازاي نحسنها, تدور على الزوايا اللي اغلب الناس مش باصة عليها علشان مشغولين بتفاصيل كل يوم.